माहिती अधिकार कार्यकर्ता महासंघाच्या श्रीगोंदा तालुका संघटकपदी प्रतीक पाचपुते यांची निवड!
सागर शेळके व पदाधिकाऱ्यांकडून शाल, श्रीफळ व पुष्पगुच्छ देऊन सन्मान; माहिती अधिकार चळवळ अधिक बळकट करण्याचा निर्धार

राशीन (वार्ताहर : ऋषभ परदेशी)
माहिती अधिकार कार्यकर्ता महासंघ फेडरेशन, महाराष्ट्र राज्य या संघटनेच्या श्रीगोंदा तालुका संघटकपदी काष्टी येथील युवा सामाजिक कार्यकर्ते प्रतीक गोकुळ पाचपुते यांची निवड करण्यात आली आहे. संघटनेचे संस्थापक अध्यक्ष सुभाष बसवेकर यांनी दिनांक ०७ नोव्हेंबर २०२६ रोजी अधिकृत नियुक्तीपत्र देऊन त्यांची निवड जाहीर केली.

नियुक्तीनंतर श्रीगोंदा तालुकाध्यक्ष सागर दयानंद शेळके यांनी पदाधिकाऱ्यांसह काष्टी येथे प्रतीक पाचपुते यांचे शाल, श्रीफळ व पुष्पगुच्छ देऊन स्वागत व सन्मान केला.
यावेळी बोलताना सागर शेळके यांनी सांगितले की, प्रतीक पाचपुते हे सामाजिक प्रश्नांवर सातत्याने काम करणारे युवा कार्यकर्ते आहेत. काष्टी, हातकलंगदा व बोडखा परिसरातील नागरिकांच्या समस्या, ग्रामपंचायतीतील कथित गैरप्रकार, पोलीस ठाण्यातील तक्रारींची दखल आणि शेतकऱ्यांच्या प्रश्नांवर त्यांनी आवाज उठविला आहे. त्यांच्या नियुक्तीमुळे संघटनेचे कार्य अधिक व्यापक होण्यास मदत होईल, असा विश्वास त्यांनी व्यक्त केला.
माहिती अधिकार कायदा हा सर्वसामान्य नागरिकांना प्रशासनाकडून पारदर्शकता आणि उत्तरदायित्व मागण्याचे प्रभावी माध्यम आहे. या कायद्याच्या माध्यमातून शासकीय कार्यालयांतील कथित गैरप्रकार उघडकीस आणण्यासाठी तसेच भ्रष्टाचाराविरोधात संघटना अधिक सक्रियपणे काम करणार असल्याचा निर्धार यावेळी व्यक्त करण्यात आला.
सत्काराला उत्तर देताना नवनियुक्त तालुका संघटक प्रतीक पाचपुते म्हणाले की, संघटनेने दाखविलेला विश्वास सार्थ ठरविण्यासाठी प्रामाणिकपणे काम करणार असून, तालुकाध्यक्ष सागर शेळके यांच्या नेतृत्वाखाली आणि संस्थापक अध्यक्ष सुभाष बसवेकर यांच्या मार्गदर्शनाखाली श्रीगोंदा तालुक्यातील गावागावांत माहिती अधिकार कायद्याबाबत जनजागृती करणार आहे. सर्वसामान्य नागरिकांच्या प्रश्नांसाठी आणि अन्यायाविरोधात संघटितपणे लढा देणार असल्याचे त्यांनी सांगितले.
या स्वागत समारंभास कपिल उल्हारे, स्वप्नील लोखंडे, दत्तात्रय कांगळे, हेमंत राजगुडे, सहादेव जगताप, परशुराम लकडे यांच्यासह संघटनेचे पदाधिकारी व कार्यकर्ते उपस्थित होते. उपस्थित पदाधिकाऱ्यांनीही संघटनेचे कार्य गावागावांत पोहोचविण्यासाठी एकजुटीने काम करण्याचा निर्धार व्यक्त केला.
प्रतीक पाचपुते यांच्या निवडीचे काष्टी, बोडखा, हातकलंगदा व श्रीगोंदा परिसरातून स्वागत होत असून, विविध स्तरांतून त्यांच्यावर अभिनंदनाचा वर्षाव होत आहे.

















