घोड-कुकडीचे पहिले आवर्तन १ नोव्हेंबरपूर्वी सोडा; श्रीगोंद्यातील शेतकऱ्यांची जिल्हाधिकाऱ्यांकडे मागणी!

🔴 घोड-कुकडीचे पहिले आवर्तन १ नोव्हेंबरपूर्वी सोडा; श्रीगोंद्यातील शेतकऱ्यांची जिल्हाधिकाऱ्यांकडे मागणी!

धरणांतील उपलब्ध पाणीसाठ्याचे नियोजन करून सिंचनाचे वेळापत्रक जाहीर करा; पिकांचे संभाव्य नुकसान टाळण्यासाठी शेतकरी नेत्यांचे निवेदन

श्रीगोंदा (प्रतिनिधी : सागर शेळके ) : घोड धरणात ९२ टक्के, तर कुकडी लाभक्षेत्रात ९६ टक्के पाणीसाठा उपलब्ध असल्याचे नमूद करत श्रीगोंदा तालुक्यातील शेतकऱ्यांसाठी घोड-कुकडी धरणाचे पहिले सिंचन आवर्तन १ नोव्हेंबरपूर्वी सोडण्यात यावे, अशी मागणी शेतकरी नेते व विविध संघटनांच्या पदाधिकाऱ्यांनी केली आहे. याबाबत १३ ऑक्टोबर रोजी जिल्हाधिकारी, अहिल्यानगर यांना निवेदन देऊन तातडीने निर्णय घेण्याची मागणी करण्यात आली.

श्रीगोंदा तालुक्यातील अनेक शेतकऱ्यांची शेती घोड व कुकडी धरणांच्या पाण्यावर अवलंबून आहे. पिकांना योग्य वेळी पाणी न मिळाल्यास उत्पादनावर परिणाम होऊन शेतकऱ्यांना आर्थिक नुकसानीला सामोरे जावे लागू शकते. त्यामुळे धरणांतील उपलब्ध पाणीसाठा, पिण्याच्या पाण्याची गरज आणि आगामी काळातील पाण्याची आवश्यकता लक्षात घेऊन सिंचनाचे नियोजन करावे, अशी भूमिका निवेदनातून मांडण्यात आली आहे.

💧 पाणी सोडण्याचे वेळापत्रक जाहीर करण्याची मागणी

घोड व कुकडी धरणांतील प्रत्यक्ष उपलब्ध पाणीसाठ्याचा आढावा घेऊन पात्र लाभक्षेत्रातील शेतकऱ्यांसाठी सिंचनाचे नियोजन करावे. संबंधित पाटबंधारे विभागाच्या अधिकाऱ्यांना आवश्यक सूचना देऊन पहिले आवर्तन १ नोव्हेंबरपूर्वी सोडण्याबाबत निर्णय घ्यावा, तसेच पाणी सोडण्याचे वेळापत्रक तातडीने जाहीर करावे, अशी मागणी करण्यात आली आहे.

पाणीवाटपात पारदर्शकता ठेवून पात्र शेतकऱ्यांना नियमानुसार पाणी उपलब्ध करून द्यावे आणि निवेदनावर केलेल्या कार्यवाहीची माहिती लेखी स्वरूपात द्यावी, असेही निवेदनात नमूद करण्यात आले आहे.

🚜 शेतकऱ्यांच्या प्रश्नाकडे प्रशासनाचे लक्ष वेधले

उपलब्ध पाणीसाठ्याचा योग्य वापर करून शेतीचे संभाव्य नुकसान टाळणे आवश्यक आहे. शेतकऱ्यांच्या आर्थिक हिताचा विचार करून जिल्हाधिकाऱ्यांनी या प्रश्नात लक्ष घालावे आणि संबंधित विभागाला तातडीने कार्यवाही करण्याचे निर्देश द्यावेत, अशी विनंती निवेदनाद्वारे करण्यात आली आहे.

या निवेदनावर शेतकरी नेते तथा माजी पंचायत समिती सदस्य राजेंद्र म्हस्के, स्वतंत्र भारत पक्षाचे अध्यक्ष अनिल घनवट, आम आदमी पार्टीचे जिल्हा उपाध्यक्ष अॅड. राजेंद्र नागवडे, जिल्हा युवक काँग्रेस चे मा अध्यक्ष स्मितल वाबळे,गोरख उंडे, परेश वाबळे, अनिल उंडे, वैभव तावरे, गणेश पोकळे, सागर शेळके, “आप” चे शहर उपाध्यक्ष प्रशांत दरेकर दिलीप घुले अॅड विद्याताई शिंद, यांच्यासह इतर पदाधिकारी व शेतकरी प्रतिनिधी उपस्थित होते

आता जिल्हा प्रशासन आणि संबंधित पाटबंधारे विभाग या मागणीवर काय निर्णय घेतात, याकडे श्रीगोंदा तालुक्यातील शेतकऱ्यांचे लक्ष लागले आहे.