राशीनच्या यमाई देवी पालखी सोहळ्यात चोख बंदोबस्त; पोलीस बांधवांवर कौतुकाचा वर्षाव!
कायदासुव्यवस्था अबाधित राखत नवरात्रोत्सव शांततेत पार पाडला; ऋषभ परदेशी यांच्या पुढाकारातून कर्जत व राशीन पोलीस प्रशासनाचा फेटा बांधून गुलाब पुष्प श्रीफळ देऊन सन्मान
राशीन (वार्ताहर : ऋषभ परदेशी) : महाराष्ट्राची कुलस्वामिनी श्री जगदंबा देवी तथा यमाई मातेच्या शारदेय नवरात्रोत्सवापासून ते विजयादशमीच्या पालखी सोहळ्यापर्यंत संपूर्ण उत्सवकाळात कायदा व सुव्यवस्था अबाधित राखत उत्कृष्ट सेवा बजावणाऱ्या कर्जत व राशीन पोलीस प्रशासनाचा फेटा बांधून, गुलाबपुष्प व श्रीफळ देऊन सन्मान करण्यात आला. पोलिसांच्या नियोजनबद्ध बंदोबस्तामुळे उत्सव निर्विघ्न, शांततेत आणि आनंदमय वातावरणात पार पडला. त्यांच्या कर्तव्यनिष्ठेचे सर्व स्तरांतून कौतुक होत आहे.
नवरात्रोत्सवाच्या प्रारंभापासून सांगतेपर्यंत मंदिर परिसरातील गर्दीचे नियोजन, दर्शनरांगेची व्यवस्था, भाविकांना मार्गदर्शन, वाहतूक नियंत्रण आणि संवेदनशील ठिकाणी बंदोबस्त अशा विविध जबाबदाऱ्या पोलिसांनी समर्थपणे सांभाळल्या. लाखो भाविकांच्या श्रद्धेचा केंद्रबिंदू असलेल्या पालखी सोहळ्यादरम्यानही कोणताही अनुचित प्रकार घडू न देता पोलिसांनी संयम, तत्परता आणि समन्वयाचे दर्शन घडवले. दर्शनासाठी आलेल्या भाविकांशी आदरपूर्वक वागणूक देत सुरक्षित व सुरळीत दर्शनासाठी त्यांनी विशेष प्रयत्न केले.
पालखी सोहळ्याची सांगता झाल्यानंतर गुरुवार, दि. २२ ऑक्टोबर २०२६ रोजी सायंकाळी सात वाजता जिजाई मंगल कार्यालय येथे वार्ताहर ऋषभ परदेशी यांनी नागरिक म्हणून पुढाकार घेत कर्जत व राशीन पोलीस प्रशासनाप्रती कृतज्ञता व्यक्त करण्यासाठी छोटेखानी सत्कार कार्यक्रम आयोजित केला होता. मात्र, पोलिसांच्या उल्लेखनीय कामगिरीबद्दल व्यक्त करण्यात आलेल्या या सद्भावनेला उपस्थित मान्यवर, पत्रकार, सामाजिक कार्यकर्ते आणि ग्रामस्थांचा उत्स्फूर्त प्रतिसाद मिळाल्याने कार्यक्रमाला व्यापक स्वरूप प्राप्त झाले.
सकाळचे ज्येष्ठ पत्रकार दत्तात्रय उकिरडे, पुढारीचे पत्रकार विजय सोनवणे, आरपीआयचे कर्जत तालुक्यातील नेते भीमराव साळवे, नष्टे सर, महादेव सायकर सर, साके सर, ॲड. शुभम पानसरे, संतोष ढावरे, सुरेश कोंडलकर, अतुल साळवे, जितेंद्र गजरमल, सूरज भाले आदी मान्यवरांच्या हस्ते पोलीस अधिकारी व कर्मचाऱ्यांना फेटा बांधून, गुलाब पुष्प आणि श्रीफळ देऊन सन्मानित करण्यात आले.
पोलीस निरीक्षक हनुमान गायकवाड यांच्या मार्गदर्शनाखाली सहाय्यक पोलीस निरीक्षक गणेश जाधव, पोलीस उपनिरीक्षक बाळासाहेब मुळीक, पोलीस उपनिरीक्षक अजिनाथ बटुळे, सहायक फौजदार अण्णासाहेब चव्हाण, पोलीस हवालदार प्रवीण सुतार, पोलीस कर्मचारी विशाल क्षीरसागर, अमोल रायकर, किरण बोराडे, प्रकाश दंदाडे, अर्जुन पोकळे, गोविंद हिंगे, मनोज मुरकुटे, चांगदेव कुमटकर, सचिन झुनगुरे, योगेश सुपेकर, नितीन धस यांच्यासह बंदोबस्तात सहभागी पोलीस बांधवांचा यावेळी सन्मान करण्यात आला.
पोलीस दलाच्या कार्याला समाजाकडून मिळालेली मनापासूनची दाद
सण-उत्सवाच्या काळात नागरिक आनंदाने उत्सव साजरा करत असताना पोलीस बांधव मात्र अहोरात्र कर्तव्य बजावत असतात. भाविकांची सुरक्षितता, गर्दीचे व्यवस्थापन आणि शांतता राखण्यासाठी त्यांना अनेकदा वैयक्तिक वेळेचे नियोजन बाजूला ठेवावे लागते. या सेवाभावाची जाणीव ठेवून आयोजित केलेला हा सन्मान म्हणजे पोलीस दलाच्या कर्तव्यनिष्ठेला समाजाकडून मिळालेली मनापासूनची दाद ठरली. पोलीस प्रशासन आणि नागरिक यांच्यातील विश्वासाचे नाते अधिक दृढ करण्याच्या दृष्टीनेही या उपक्रमाचे महत्त्व अधोरेखित झाले.
कार्यक्रमाचे प्रास्ताविक ज्येष्ठ पत्रकार दत्तात्रय उकिरडे यांनी केले, तर पोलीस निरीक्षक हनुमान गायकवाड यांनी आभार मानले. यावेळी उपस्थित मान्यवर, पत्रकार, सामाजिक कार्यकर्ते आणि ग्रामस्थांनी पोलीस प्रशासनाच्या कार्याचे विशेष कौतुक केले.
पुढील वर्षीही आई जगदंबेच्या कृपेने नवरात्रोत्सव आणि विजयादशमीचा पालखी सोहळा असाच शांततेत, सुरक्षिततेत व उत्साहात पार पडावा, अशी भावना व्यक्त करण्यात आली. पोलिसांच्या शिस्तबद्ध कार्याला मिळालेली ही सार्वजनिक पावती राशीनच्या सामाजिक सलोख्याचे आणि कृतज्ञतेच्या संस्कृतीचे प्रतीक ठरली.