उत्सव राशीनमध्ये, मग नियोजनाची बैठक कर्जतला का ?
श्री जगदंबा देवी नवरात्रोत्सवाच्या शांतता बैठकीचे ठिकाण बदलण्याबाबत ग्रामस्थांचा सवाल; “राशीनमध्येच बैठक घ्यावी” अशी मागणी
राशीन (प्रतिनिधी : ऋषभ परदेशी) : महाराष्ट्रातील लाखो भाविकांचे श्रद्धास्थान असलेल्या राशीनच्या श्री जगदंबा देवी नवरात्रोत्सवाच्या पार्श्वभूमीवर प्रशासनाकडून आयोजित करण्यात येणाऱ्या शांतता व नियोजन बैठकीच्या ठिकाणावरून ग्रामस्थ, सेवेकरी व भाविकांकडून प्रश्न उपस्थित करण्यात आला आहे. नवरात्रोत्सवाचे मुख्य आयोजन राशीन येथे होत असताना संबंधित बैठक कर्जत येथे घेण्याचे नियोजन असल्यास, बैठकीचे ठिकाण बदलण्यामागील प्रशासकीय, सुरक्षा किंवा अन्य कारणे कोणती, याबाबत प्रशासनाने स्पष्टता द्यावी, अशी मागणी होत आहे.
श्री जगदंबा देवी नवरात्रोत्सवात राज्याच्या विविध भागांतून मोठ्या संख्येने भाविक राशीनमध्ये दाखल होतात. या काळात मंदिर परिसरातील गर्दीचे नियोजन, वाहतूक व्यवस्था, वाहनतळ, भाविकांची सुरक्षितता, पालखी मार्ग.कायदा-सुव्यवस्था, आरोग्य सुविधा, स्वच्छता तसेच आपत्कालीन व्यवस्थापन या बाबींवर संबंधित विभागांमध्ये समन्वय आवश्यक असतो.
त्यामुळे शांतता व नियोजन बैठक ही उत्सवाच्या प्रत्यक्ष ठिकाणाशी संबंधित असल्याने ती राशीनमध्ये घेण्यात आल्यास स्थानिक परिस्थितीचा प्रत्यक्ष आढावा घेणे तसेच ग्रामस्थ, सेवेकरी, मंदिर व्यवस्थापन आणि प्रशासन यांच्यात समन्वय साधणे अधिक सुलभ होईल, अशी भूमिका ग्रामस्थांनी मांडली आहे.
“राशीन हेच उत्सवाचे केंद्र; मग बैठकही येथेच का नाही ?”
नवरात्रोत्सवाचे आयोजन राशीनमध्ये होत आहे, भाविकांची संभाव्य गर्दी याच ठिकाणी होणार आहे आणि वाहतूक व कायदा-सुव्यवस्थेचे प्रत्यक्ष नियोजनही याच परिसरात करावे लागणार आहे. त्यामुळे शांतता व नियोजन बैठक राशीन येथील श्री जगदंबा देवी मंदिर परिसरात घेण्याचा विचार प्रशासनाने करावा, अशी मागणी पुढे आली आहे.
बैठक कर्जत येथे घेण्यामागे काही प्रशासकीय, सुरक्षा किंवा अन्य कारणे असल्यास ती प्रशासनाने स्पष्टपणे ग्रामस्थांसमोर मांडावीत, अशी अपेक्षा स्थानिक नागरिकांनी व्यक्त केली आहे. कोणताही गैरसमज निर्माण होऊ नये आणि प्रशासन व स्थानिक नागरिकांमध्ये समन्वय कायम राहावा, यासाठी बैठकीच्या ठिकाणाबाबत पारदर्शकता असावी, अशी मागणीही करण्यात आली आहे.
स्थानिक लोकप्रतिनिधी व सामाजिक कार्यकर्त्यांची
भूमिका
राशीनमध्येच शांतता व नियोजन बैठक घेण्याच्या मागणीला विविध राजकीय पक्षांचे पदाधिकारी व सामाजिक कार्यकर्त्यांनीही समर्थन दर्शविले आहे. सुभाष जाधव (शिवसेना उद्धव बाळासाहेब ठाकरे पक्षाचे कर्जत-जामखेड विधानसभा प्रमुख), तात्यासाहेब माने (भारतीय जनता पार्टी भटके-विमुक्त प्रदेश उपाध्यक्ष), सामाजिक कार्यकर्ते रवींद्र दामोदरे, सामाजिक कार्यकर्ते मालोजीराजे भिताडे, राष्ट्रवादी काँग्रेस पार्टी शरदचंद्र पवार पक्षाचे निष्ठावंत कार्यकर्ते माऊली सायकर यांनी प्रशासनाने स्थानिक नागरिकांच्या मागणीचा सकारात्मक विचार करावा, अशी भूमिका मांडली आहे.
त्यांच्या मते, ही मागणी प्रशासनाच्या विरोधातील नसून उत्सवाचे नियोजन प्रत्यक्ष उत्सवस्थळी आणि स्थानिक नागरिकांच्या सहभागातून अधिक प्रभावीपणे व्हावे, या उद्देशाने करण्यात येत आहे. नवरात्रोत्सव शांततेत, शिस्तबद्ध आणि सुरक्षित वातावरणात पार पाडण्यासाठी प्रशासनासोबत ग्रामस्थ, सेवेकरी, मंदिर व्यवस्थापन व संबंधित विभागांचा समन्वय अत्यावश्यक असल्याचे त्यांनी नमूद केले.
प्रशासनाच्या निर्णयाकडे लक्ष
बैठक कुठे घ्यायची हा प्रशासनाच्या अधिकारक्षेत्रातील विषय असला तरी, राशीनमध्येच बैठक घेण्याची स्थानिक नागरिकांची मागणी प्रशासनाने सकारात्मकपणे विचारात घ्यावी, अशी अपेक्षा व्यक्त होत आहे.
“उत्सव राशीनमध्ये, नियोजन राशीनमध्ये आणि स्थानिक प्रश्नांची माहितीही राशीनमधूनच—मग शांतता बैठकीसाठी राशीनऐवजी अन्य ठिकाण निवडण्याची आवश्यकता काय?” असा सवाल सध्या ग्रामस्थांकडून उपस्थित केला जात असून, याबाबत प्रशासन काय भूमिका घेते, याकडे ग्रामस्थ व भाविकांचे लक्ष लागले आहे.