राजकीय वर्तुळात नेहमी आपल्या रोखठोक विधानांमुळे चर्चेत असणारे शिवसेनेचे (शिंदे गट) आमदार संजय गायकवाड यांच्या अडचणीत मोठी वाढ झाली आहे. एका वादग्रस्त वक्तव्यावरून आणि अयोग्य हावभावांमुळे बुलढाणा शहर पोलीस ठाण्यात त्यांच्याविरोधात थेट विनयभंगाचा गुन्हा दाखल करण्यात आला आहे. एका महिलेने दिलेल्या तक्रारीवरून हा कायदेशीर बडगा उगारण्यात आला आहे.
नेमका वाद काय होता?
काही दिवसांपूर्वी (१ सप्टेंबर रोजी) आमदार श्वेता महाले बुलढाण्यात एका कार्यक्रमादरम्यान ‘बाप तो बाप रहेगा’ या गाण्यावर थिरकल्या होत्या. या घडामोडीवर जेव्हा प्रसारमाध्यमांनी आमदार संजय गायकवाड यांना प्रश्न विचारला, तेव्हा त्यांनी उत्तर देताना एक अत्यंत वादग्रस्त टिप्पणी केली होती. त्यांनी म्हटले होते की, “’बाप तो बाप रहेगा’ हे माणसानं बोललेलं बरं, पण एखाद्या बाईनं म्हटलं की बाप आहे, तर बाई बापासारखं शरीर कुठून आणणार?”
गायकवाड यांनी हे वक्तव्य करताना केलेले हावभाव आणि वापरलेली भाषा यामुळे महिलांच्या मनाला लज्जा वाटली, असा आक्षेप तक्रारदार महिलेने आपल्या तक्रारीत घेतला आहे.
पोलिसांकडून पुढील तपास सुरू
या वक्तव्यानंतर महिला वर्गातून तीव्र संताप व्यक्त केला जात होता. अखेर तक्रारीची गंभीर दखल घेत बुलढाणा पोलिसांनी आमदार संजय गायकवाड यांच्याविरुद्ध कायदेशीर कारवाई करत विनयभंगाचा गुन्हा नोंदवला आहे. या प्रकरणामुळे आता राजकीय वर्तुळात एकच खळबळ उडाली असून, पोलीस या प्रकरणाचा पुढील तपास करत आहेत.